Ынталы марапат – үлгіге жарамақ!

ССКӨБ акционерлік қоғамының өндіріс саласында әлемдік деңгейде ойып тұрып орын алуы – қарапайым жұмысшылардың маңдай терінің арқасы. Қайратты азаматтардың қажырлы еңбегі еліміздің эканомикасын дамытуға септігін тигізуде. Кәсіпорындағы тепсе темір үзетін құрыш білекті жігіттердің бірі Серік Мұратов адал қызметінің арқасында өз бөлімшесінің алғы шепті еңбекшілері қатарынан көрінді. 

 ССКӨБ-тің жөндеу учаскелерінің бірінде слесарь-жөндеуші болып жүрген Серік Төлепбайұлы 17 жылдық еңбек тәжірибесіне ие. Өзбекстаннан ата жұртқа қоныс аударғалы ССКӨБ-ке жұмысқа орналасқан. Бұл өлкеге көшіп келуіне де, бірлестікте жұмыс істеуіне де туысқандары себепкер болыпты. Кәсіптік дипломы бар жас жігіт кеншілер қаласына келеген соң техникалық жабдықтарды жөндеу басқармасының еңбекті көп қажет ететін жұмыстарды механикаландырудың мамандандырылған зертханасында жұмыс бастаған.
– Өндірістегі жұмыс барысын жеңілдетуге бағытталған жабдықтарды құрастырып шығамыз. Алдымен мақұлданған сызбасы беріледі. Соған қарай әр мамандық иесі өз кезегімен жоспарды орындайды. Мысалға, таяуда ғана көптеген автокөлік жөндеуші цехтарда пайдаланыла бастаған бөшке тасушы арба біздің учаскеде құрастырылып шығарылған. Одан бөлек, кеніштегі бұрғылау жұмыстарында қолданылатын алып домкраттарды да біз құрастырамыз, – дейді тәжірибелі маман.
Бір орында сол мамандық бойынша 17 жыл қызмет етіп келе жатқан Серік Мұратовтың еңбегі жоғары бағаланды. Ол өз бөлімшесіндегі құрмет тақтасына бірінші рет ілініп отыр. Осындай марапатқа, сый-құрметке ие болғанын мақтан тұтады екен.
– Әрине, бұл марапат көңілге қуаныш ұялатады. Дегенмен, оның жауапкершілігі басымырақ. Бірлестік әкімшілігі өз қызметкерлерлерін үнемі осылай ынталандырып отырады. Мен үшін бұл кәсіпорынның саясаты өте орынды. Себебі, еңбегің еленсе өз міндетіңді атқаруға деген бойыңдағы күшің еселене түседі. Осындай құрметке лайық қанша жұмысшыларды жақсы білемін. Олардың бүгінгі әрекеті келер ұрпаққа жарқын үлгі, – дейді кейіпкеріміз.
Серік Төлепбайұлы биыл 40 жасқа толады. Өз кәсіпорны үшін талмай еңбек ететін қайратқа ие сәті. Жұмыстан тыс дәнекерлеушілік жұмыстарымен де айналысып тұратын көрінеді. Дегенмен, бос уақытының басым бөлігін жұбайына және 3 перзентіне арнайды екен.
Серіктің сенімді жоспарлары, алға қойған мақсаттары бірқанша. Ендеше, оларға жету жолында сәттілік жолдас болсын дейміз!

Жарасқан БЕКНАЗАРҰЛЫ
Суретті түсірген автор