Айыппұл өспейді

2021 жылдың басынан бастап Қазақстанда айлық есептік көрсеткіш мөлшері өзгерді. 2 778 теңгеден 2 917 теңгеге дейін өсті, осыған байланысты мемлекеттік баждар мен өсімпұлдардың сомалары автоматты түрде өсті, олардың мөлшері есептік көрсеткіштерде дәл белгіленген.

Жеңілдіктер, әлеуметтік төлемдер, салықтар, айыппұлдар және тағы басқалар. Осы төлемдердің барлығы АЕК мөлшерімен тікелей байланысты. Сондықтан ондағы кез-келген өзгеріс жоғарыда айтылған төлемдердің өзгеруіне әкеп соқтырады. Ал, айыппұлдар көлемі 2021 жылда өзгерген жоқ. Алайда, айлық есептік көрсеткіштің 139 теңгеге өсуіне байланысты, нәтижесінде әкімшілік құқық бұзушылық үшін төленетін төлем мөлшері өсті. Осылардың анық қанығын білмеген кез келген азамат айыппұл төлемі барысында адасуы мүмкін.
– Айыппұлды өз еркіңізбен төлеу мерзімі 30 күн. Егер 30 күн ішінде төмеген болсаңыз, құжаттар сот орындаушыларына беріледі. Олар қарызды өндіру бойынша заң талаптарына сай әрекет ететін болады, – дейді Қалалық ПБ әкімшлік полиция бөлімінің инспекторы Виктория Бисембаева.
Әрине, қалтам қағылмасын десеңіз, заңды бұзбаған жөн. Дегенмен, «айыппұлдарды төлеудің жеңілдетілген шарттары» Қазақстан азаматтарына қол жетімді екенін еске саламыз.
– Жасалған құқық бұзушылықпен келіскен жағдайда жеті күн ішінде айыппұлды жеңілдетілген тәртіппен төлеуге құқығыңыз бар, яғни жалпы айыппұл мөлшерінің 50 пайызын ғана төлейсіз, – деді инспектор өз сөзінде.
2021 жылдың басынан бастап полиция қызметкерлері Рудныйда 260-тан астам әкімшілік құқық бұзушылықты тіркеді, оның 104-іне айыппұл салынған. Бұл бойынша мемлекет пайдасына өндіріп алынатын жалпы сома 1 миллион теңгеден асады. Алайда, жауапкершілікке тартылған барлық азаматтар да айыппұлды төлеуге асықпайтын көрінеді. Жоғарыдағы заң бұзушылардан өндірілген ақша 200 мың теңгеге де жетпейді.
Ең көп төленбеген айыппұлдар: қоғамдық орындарда алкоголь-
дік ішімдіктерді ішу, қоғамдық орындарды ластау, қоғамдық орындарда темекі шегу және тыныштықты бұзу айыптарымен байланысты.

Жарасқан НҰРЫБАЕВ