«Жастар» турнирі

«Жастар» турнирі

Бұл турнир 20 желтоқсанда басталды. Оған Қазақстанның сегіз командасы қатысып, төрт командадан екі топқа бөлінді. «А» құрамына павлодарлық «Мұнайшы», көкшетаулық «Арлан», петропавлдық «Құлагер» және қарағандылық «Қыран» командалары кірді. Олардың арасындағы кездесулер Көкшетау қаласында өтті.
Рудныйда «Б» тобының өкілдері жарысты.
– Жас балалардың ойыны демесеңіз, өте қызықты әрі тартысқа толы болды. Көптеген жанкүйерлер жиналды, тартысты ойындардың куәсі болды, өз командалары, соның арасында рудныйлықтарға да жанкүйер болды. Біздің қалада төрт команда ойын өткізді. Олар – «Ақтөбе», «Горняк», «Алматы» және «Астана». Бірінші айналымда жеңген екеуі ақтық ойында кездеседі, – дейді «Горняк» ЖХК бас бапкері Борис Гостиев.
Ойынның алғашқы күнінде «Горняк» «Астана» командасын 6:2 есебімен жеңді. Бірақ, қалған екі ойында «Горняк» алдымен «Алматыдан» 3:6 есебімен ұтылды. Содан кейін турнир кестесінде бірінші орында тұрған ақтөбеліктер біздің спортшыларды 1:3 есебімен жеңіп кетті.
Нәтижесінде «Б» тобында «Горняк» командасы ІІІ орынға ие болды. Бұл – олардың Көкшетауда өтетін финалдық ойындарға қатыса алмайтындығын білдіреді. Екі топтағы үздіктер кездесулерінің нәтижелеріне тоқталсақ, «Арлан» мен «Алматы» командалары 3-орын үшін күрескен болатын, нәтижесінде көкшетаулық «Арлан» қола медальды иеленді. Финалда топ үздіктері «Ақтөбе» мен павлодарлық «Мұнайшы» хоккейшілері кездесті. Ақтөбеліктер басым түсіп, «Мұнайшы» екінші орынмен еліне қайтты.

Жарасқан БЕКНАЗАРҰЛЫ
Суретті түсірген
Виктор НАЗАРОВСКИЙ