Жылдам. Сапалы. Сенімді.

Бұдан былай «ССКӨБ» АҚ тауарлық өнімінің химиялық құрамын бірер минутта анықтай алады. Өйткені Техникалық бақылау бөлімінде көптен күткен «SIMULTIX 15» спектрометрі орнатылып, іске қосылды.

 Жапондық жабдық барлық сапа және қауіпсіздік талаптары ескеріле отырып шығарылған. Бөлімше қызметкерлері ол арқылы концентрат пен шекемтасты құрайтын негізгі сегіз элементке экспресс-талдау жүргізе алады. Нәтиже де, дәлдік те бар. Сондай-ақ «SIMULTIX 15» өнімділік, функционалдылық және ыңғайлылық бойынша өзінен бұрынғылардан әлдеқайда асып түседі.
Рентгендік спектрлік кешендер – кәсіпорындағы химиялық-аналитикалық бақылауға арналған мамандандырылған зертхана үшін таптырмас жабдық. Экспресс-талдау 1-2 минут ішінде жүзеге асырылады.
– Спектрометр шығарылған барлық өнімді тексереді. Сондықтан ол сенімді, әрі тиімді болу қажет, – дейді рентгендік спектрлік анализ тобының жетекшісі Андрей Копылов. – SIMULTIX-тің жұмыс істеу принципі басқалардан ерекше. Онда біз зерттеулер жүргізетін қосымша каналдар бар. Қазіргі уақытта анықтайтын элементтер тізімі 11-ге дейін өсті, бірақ теория жүзінде бұған бүкіл Менделеев кестесі сыйып кетуі мүмкін.
Маманның айтуынша, үздіксіз қуат көзі орнатылған жаңа жабдықтың салқындату жүйесі де заман талабына сай. Импульстерді есептеудің жаңа технологиясының арқасында зерттелетін элементтің жүзден бір бөлігіне дейінгі пайызын білуге болады. Санау жүйесі жұмысының тұрақтылығы да артты. Мұның барлығы алынған нәтиженің шынайылығына жауап беретін талдаудың сапасына оң әсер етпек.
«SIMULTIX 15» спектрометрі кәсіпорынның инвестициялық бағдарламасы бойынша сатып алынды. Пайдалану мерзімі – 10 жыл. Алайда қызметкерлер жабдықты күтіп ұстаса, ол әлдеқайда ұзақ жұмыс істеуі мүмкін.

Жарасқан НҰРЫБАЙ
Фото Куаныша Ескабулова