Ұлттық құрамада рудныйлықтар

Ұлттық құрамада рудныйлықтар

Қостанайда өткен ұлдар мен қыздар арасында дзюдодан Қазақстан чемпионатына еліміздің 14 облысынан 695 дзюдошы қатысты. Татамиге 2003-2004 жылы туған спортшылар шықты. Қостанай облысының намысын қорғау үшін рудныйлық Жансая Ерқуанышова мен Дина Балун есімді қыздар қатысты. Турнир қорытындысы бойынша екеуінің де бағы жанып, өздерінің салмақ санаттарында алтын жүлдегер атанды. Чемпионат жеңімпазы Дина Балун осы уақытқа дейін біраз жарыстарға қатысып келеді. Қостанайда өткен додада 63 келіге дейінгі салмақ категориясында көк кілемге шығып 5 кездесу өткізген. Қарсыластарының осал болмағанын айтқан ол, жартылай финалда аса қиын күрес өтті дейді. Қыз баланың айтуынша осындай үлкен жарыстар спортшының өзіне деген сенімділігін арттырып, алдыға қарай ұмтылуына көмектеседі екен.
Қостанай облысының құрамасы бұл турнирде барлығы 3 алтын, 1 күміс және 1 қола жүлдені қоржынға салды. Бұл біздің өңіріміз үшін жалпы командалық есепте медальдар саны бойынша 3-ші орынға табан тіреуге мүмкіндік берді. Сондай-ақ жарыстардың қорытындысы бойынша турнирдің үздік дзюдошылары анықталды. Жансая Ерқуанышова өзінің салмақ категориясында 1-ші орыннан бөлек, жасыл кілемде өнер көрсеткен барлық қыздар арасынан үздік атанды. Жансаяның бұл жеңісі оған үлкен мүмкіндіктер сыйлап отыр. Болашақта олимпиада ойындарына қатысқысы келетін ол, алдағы уақытта тыным таппай еңбек етуге әзір екендігін айтты.
Бұл турнирден кейін рудныйлық дзюдошылар босаңси алмайды, өйткені Республика чемпионатында бірінші орынға ие болғандықтан, қыздар Қазақстанның ұлттық құрамасына енді және алдағы уақытта Еуропа чемпионатына дайындалатын болады. Бұл додалы жарыс жақын арада Түркияның Анталия қаласында өтпек. Ендеше, ержүрек қыздарымызға сәттілік тілеп, осы жарыстардың шыңынан көріну бұйырсын демекпіз.

Ерғали УБАЙДУЛЛАЕВ
Сурет жеке мұрағаттан алынған