Үлгілі машинист

Үлгілі машинист

Қанағат Пердебайұлы 1988 жылы Өзбекстан Республикасының Үшқұдық қаласында туылған. 2006 жылы Рудный қаласына қоныс аударып, 2008 жылы Соколов-Сарыбай тау-кен өндірістік бірлестігіне жұмысқа орналасқан. Біліктілігін арттыру үшін Қанағат Рудный индустриалдық институтының колледжіне ашық игеру мамандығы бойынша оқуға түскен. Оқу орнында алған білімімен кейіпкеріміз қазіргі таңда Бірлестіктің шекемтас өндіру цехында машинист болып еңбек етеді. 12 жыл бойы бір жұмыс орнында жұмыс істеп, оған жүктелген міндетті тиянақты әрі сапалы орындағаны үшін, жақында Қанағат Пердебайұлын цех басшылары «Құрмет тақтасына» ұсынды.
– Цехтағы біздің бригада шекемтас өндіру процесін бақылайды. Бұл жерде өндірілетін өнімнің сапасы жоғары болуы тиіс. Өйткені сапалы өнім әрдайым сұранысқа ие болады. Цехтағы еңбек ұжымы да үздіктердің қатарында. Жұмысшылар әрдайым бір-бірін қолдап, кез келген уақытта қол ұшын созуға әзір, – дейді Қанағат Абдурауков.
Қанағат бүгінгі еңбек жетістігіне қол жеткізуге учаске шебері Сергей Понамарев және ұстазы Андрей Лукьяновтың қосқан үлесі зор дейді. Жас маман бірлестікке алғаш келгенде осы азаматтардың арқасында кәсіпті меңгерген. Кейіпкеріміз бос уақытында футбол ойнап, жанұясымен серуендеуді ұнатады екен. Қанағаттың інісі де ағасының осындай жетістіктерін көріп, шекемтас өндіру цехына жұмысқа орналасқан.
– Бірлестікте еңбек етудің көптеген оң жақтары бар. Кәсіпорын басшылары жүргізіп отырған саясаттың арқасында, әр қызметкердің табатын табысы көбейіп, қауіпсіздігіне де үлкен назар аударылған. Бұған қоса әлеуметтік бағдарламалары да аз емес, – дейді үлгілі маман.
Алдағы уақытта Қанағат Пердебайұлы қазіргі жетістігімен тоқталып қалмай, білімі мен біліктілігін жетілдіру үшін Рудный индустриалдық институтына оқу түсуді жоспарлап қойыпты. Өйткені жоғары білімі бар маман үшін кәсіпорында үлкен мүмкіндіктер бар. Мансап баспалдағы бойынша жоғары көтерілуге қолайлы жағдайлар жасалған, деді Қанағат Абдурауков.

Ерғали Убайдуллаев
Суретті түсірген Виктор Назаровский