Құрмет тақтасынан көрінді

«ССКӨБ» АҚ барлық бөлімшелерінде орналасқан «Құрмет тақталары» жыл сайын жаңа есімдермен толығып келеді. Мұндай құрмет жыл қорытындысы бойынша тиянақты жұмысымен көзге түсіп, өндіріс жоспарын орындауға септігін тигізген жұмысшыларға көрсетіледі. Биылғы жылы бұл дәстүр өз жалғасын тауып, бірлестік бөлімшелеріндегі «Құрмет тақталары» үлгілі жұмысшылардың фотосуреттерімен толықты. Сондай мамандардың арасында Шекемтас өндіру цехында механик болып қызмет істейтін Бауыржан Ізтілеуов те бар.

 Қостанай облысының Арқалық қаласында туып-өскен Бауыржан Бақытбекұлы бала кезінен болашағын техникалық мамандықпен байланыстыруды армандаған. 2006 жылы орта мектепті тәмамдаған ол, Рудный қаласындағы политехникалық колледжге оқуға түскен. Арада үш жыл өткен соң техник-механик мамандығын игеріп алған жас маман «ССКӨБ» АҚ-ның күйдіру учаскесіне жұмысқа орналасқан. Бастапқыда слесарь-жөндеуші болып еңбек еткен кейіпкеріміз, біліктілігін арттырып, мансап баспалдағы бойынша көтерілу ниетімен жергілікті жоғарғы оқу орнына түскенін айтты.
– Жұмыс істеп жүрген кезімде әріптестерімнің кеңесі бойынша Рудный индустриялық институтына оқуға түсіп, «машиналар мен жабдықтар технологиясы» мамандығы бойынша диплом алып шықтым. Учаске басшылығы механик болуды ұсынып, арнайы тестілеуден сүрінбей өттім. Жалпы слесарь-жөндеуші мамандығы бойынша жұмыс өтілім 10 жылды құрайды. Қазіргі лауазымға өткен жылдың мамыр айында тағайындалдым, – дейді Бауыржан Ізтілеуов.
Жас маманның бүгінгі міндеті күйдіру машиналарына қызмет көрсететін технологиялық желдеткіштердің жұмысқа қабілеттілігін қадағалаудан, жоспарлы жөндеуді жүргізуден, қарамағындағы жұмысшыларға бас-көз болып, қауіпсіздік ережелерін қатаң сақтаудан құралады. Бауыржанның айтуынша технологиялық желдеткіштердің барлығы күйдіру процесінде бөлініп шыққан шаң-түтін мен күйдіру қалдықтарын шығару қызметін атқарады. Сапалы өнімнің шығуы дәл осы жабдықтардың ақаусыз жұмыс істеуінен де тәуелді дейді.
– Механик болу ең алдымен үлкен жауаптылықты талап етеді. Сонымен қатар жұмысшыларды үнемі бақылап отыруың керек. Себебі біздің бүгінгі қызметіміз күрделі жұмыстар қатарына жатады. Қарамағымда 3 дәнекерлеуші мен 3 слесарь-жөндеуші мамандары бар. Барлығымыз жұмысты тиянақты орындап, сапалы өнім шығаруға атсалысамыз. Жөндеу жұмыстарын уақтылы жүргізуге тырысамыз, – дейді күйдіру учаскесінің механигі.
Күнделікті міндеттерімен қоса Бауыржан Бақытбекұлы кәсіпорында өткізіліп тұратын «Идеялар фабрикасына» өндірісті арттыруға септігін тигізетін тың жобаларын да жиі ұсынады екен. Солардың бірі басшылыққа таныстырылғанымен, әлі де жетілдіретін тетіктері бар дейді. Жас маманның осындай ынтасы мен талпынысы жақында лайықты бағаланып, Бауыржан Ізтілеуов күйдіру учаскесінің 2021 жылғы «Құрмет тақтасына» ілікті. Мұндай марапатты кейіпкеріміз көп жылдық еңбегінің жемісі деп біледі.
Күйдіру учаскесінің технологиялық желдеткіштер бойынша механигі өз болашағына үлкен сенім артып отыр. Ең алдымен сеніп тапсырылған лауазым бойынша барлық міндеттерін тиянақты орындап, мансап баспалдағы бойынша әрі қарай көтерілуді мақсат етіп қойған. Бұнымен қоса жас жігіт алдағы уақытта отбасын құруға да ниетті.

Ерғали Убайдуллаев
Суретті түсірген Елена Артемова