Келісімшарт ұзартылды

Рудныйлық «Аят» мини-футбол клубы биылғы Ел чемпионатында спортшыларымыздың қола жүлдегер атануына елеулі үлес қосқан бразилиялық бапкер Антонио Вагнермен келісімшартты ұзартты. Енді тәжірибелі маман 2023 жылдың жазына дейін жергілікті футболшылармен жұмыс істейтін болады. Бұл туралы клубтың әлеуметтік желілердегі ресми парақшасында жарияланған.

Дос Сантос Антонио Вагнер ағымдағы жылдан бастап «Аят» футболшыларын жаттықтыруды қолға алған болатын. Бұдан бұрын бұл лауазымда ресейлік маман Александр Соколов жұмыс істеген болса, ол кеткеннен кейін клубтың бас бапкері міндетін Василий Смолин атқарып келген.
Бразилияда «Кабеса» есімімен танымал болған Антонио Вагнер балалардың мықты жаттықтырушыларының бірі саналады. Ересек футболшыларды да дайындау тәжірибесі болғандықтан, Рудныйлық клубқа бас бапкер болу ұсынысын қабылдаған. «Аят» футбол клубының басшылары да бразилиялық маманның біліктілігіне үміт артып, өткен маусым қорытындысы бойынша оның шеберлігіне көз жеткізді.
Антонио Вагнер «Аят» футболшыларын жаттықтырумен қатар, осы клуб қатарында ойнап жүрген жас футболшыларға да қолдау көрсетіп, шеберлік сабақтарын жиі өткізіп тұрады. Осындай сабақтары барысында бас бапкер ойнау техникасын жетілдіруді, жақсы қорғана білуді және ойын алаңында шабуыл тактикасын ұйымдастыруды үйретеді Айтып өтейік, бразилиялық маманның жетекшілігімен, мини-футболдан биылғы Ел чемпионатында рудныйлықтар шеберлік танытып, «Ақтөбе» командасымен өткен ойындар сериясында басым түсіп, осымен 6-шы рет қола жүлдеге ие болған еді. Команда тарихында сондай-ақ күміс жүлделер мен біріншіліктегі чемпиондық титулдың да бар екендігін атап өткен жөн.
Тәжірибелі маманның арқасында «Аят» ойыншылары келесі футбол маусымында бұдан да жақсы ойын көрсетіп, кезекті чемпиондық титулға қол жеткізеді деген үміттеміз. Ендеше, жанкүйерлер атынан, бас бапкерге сәттілік тілейміз!

Ерғали Убайдуллаев
Сурет интернеттен алынды