Қолыңнан іс келсе – жеңесің!

   Осындай қағиданы ұстанатын кейіпкеріміз «ССКӨБ» АҚ-ның Жөндеу механикалық – металл илектеу зауытында еңбек етеді. Ол – металл құю цехының слесарь-жөндеушісі Ербол Намазов. Жас маман кен алыбына 2017 жылы орналасып, тәртіп пен өнімді еңбегінің арқасында биыл жұмыс орнының «Құрмет тақтасына» ілікті.

   Слесарь-жөндеуші Ербол Намазов үшін кезекті жұмыс күні ең алдымен қауіпсіздік ережесіне сәйкес жеке қорғаныс құралдарын киюден басталады. Бұл, бірлестікте орындалатын кез-келген жұмысты бастау алдында қойылатын негізгі талап. Басшылықтан наряд-тапсырамасын алған соң, жас маман ақаулы жабдықтар тізімімен танысып, шұғыл қалпына келтіруге кіріседі. Ерболдың айтуынша, жөндеу-механикалық зауытында техникалар мен жабдықтардың алуан түрлері болғандықтан, жөндеушілерге сұраныс жоғары.
   - Зауыттағы слесарь-жөндеушілер көп жағдайда ленталы конвейер, элеватор, арбалар мен темір балқыту пештері сияқты жабдықтарды жөндеумен шұғылданады. Бұдан бөлек, цехтағы басқа да техникаларға жоспарлы жөндеу жүргіземіз. Біздің бригадада 3 адам, 1 дәнекерлеуші мен 2 слесарь-жөндеуші бар. Егер атқарылатын жұмыс ауқымды болса, қатарымызға қосымша жөндеушілер де қосылады, - дейді Ербол Төреханұлы.
   Бүгінгі кейіпкеріміз Өзбекстан жеріндегі Зарафшан қаласының тумасы. 2003 жылы атажұртына қоныс аударған соң осы жерде білім алып, 2013 жылы Қарағанды қаласындағы жоғарғы оқу орындарының бірін таңдаған. Ерболдың негізгі мамандығы автожолмен байланысты болғанымен, тәжірибе жинақтау үшін кен алыбына келіп, жөндеу ісіне бет бұрғанын айтады.
   - 2017 жылы жөндеу-механикалық зауытына орналасып, біраз уақыт өткен соң әскерге аттандым. Отан алдындағы борышымды лайықты өтеп келгеннен кейін өзім еңбек еткен цехқа оралып, жөндеушілікті жалғастырдым. Бұл жердің ең алдымен ұжымы мен еңбек жағдайлары ұнайды. Кәсіпорын тарапынан жұмысшыларға төленетін жалақысы мен басқа да жеңілдіктері көңілімнен шықты, – дейді слесарь-жөндеуші.
Ерболдың металл құю цехында еңбек етіп жатқанына небәрі 3 жыл болса да, кейіпкеріміз осы уақыт ішінде үлгілі тәртібі мен сапалы еңбегімен көзге түскен. Оның айқын дәлелі – зауыттың «Құрмет тақтасына» ілігуі.
   – Мен үшін бұл айтарлықтай жетістік әрі абырой болып табылады. Қарапайым жұмысшыларға көрсетіліп отырған мұндай құрмет алдағы жұмысқа шабыттандыратыны сөзсіз. Ендігі міндетім тиянақты жұмысымды жалғастырып, жоспардың орындалуына үлес қосу, – дейді жас маман.
   Ербол Намазов өз болашағына үлкен жоспар құрып отыр. Біліктілігін арттыру мақсатында кейіпкеріміз Рудный индустриялық институтына түсіп, бірлестікке қажетті қосымша мамандықты игерсем, – дейді. Жас маманның мұндай талпынысын отбасы мүшелері де қолдап, Ерболдың білгір маман болатынына сенімді.

Ерғали Убайдуллаев