Үй өртенді

Үй өртенді

Шілденің 22-сі күні түскі уақытта қаламыздағы Батищев-Тарасов көшесінің бойында орналасқан жер үйлердің бірінде өрт шықты. Абырой болғанда адам шығыны жоқ.

Өрт сөндіру бөлімшесінің диспетчеріне өрт оқиғасы жайлы хабарлама 13.45 сағатта келіп түскен. Отты ауыздықтау үшін оқиға орнына өрт сөндірушілердің екі жасағы мен екі автоцистернасы аттанған. Шамамен 15 минуттың ішінде келіп жеткен құтқарушылар бес бөлмелі жер үйдің бір бөлмесінде диванның жанып жатқандығын анықтап, дереу сөндіруге кіріскен. Құтқарушылардың айтуынша өрт жер үйдің қонақ бөлмесінен шығып, шамамен алты шаршы метрге жайылған. Абырой болғанда зардап шеккендер жоқ.
– Диспетчерге Батищев-Тарасов көшесіндегі тоғызыншы үйде өрт шыққаны туралы хабар келіп түскен сәтте оқиға орнына құтқарушылар келіп жетті. Біздің жасақпен бірге полиция және жедел жәрдем қызметкерлері де келді. Өрт шыққан үйдің иесі дін аман. Үйдің қонақ бөлмесіндегі диван, кресло және төсек-орын жанған. Сонымен қатар терезе жақтаулары да ішінара зақымдалыпты. Өрт шығудың нақты себебін төтеншеліктер тергеу жүргізгеннен кейін анықтайтын болады, – дейді Рудный қаласы №2 мамандандырылған өрт сөндіру бөлімшесі бастығының орынбасары Бахтияр Нұрмағамбетов.
Төтенше жағдайлар басқармасының қызметкерлері осындай келеңсіз жағдайларды болдырмау үшін тұрғындарды сақ болуға шақырып, ток көздерін, электр аспаптарын, пешті ұқыпты пайдаланып, үйдің ішінде темекі шекпеуді ескертіп отыр.

Ерғали Убайдуллаев
Суретті түсірген автор