Донор қаны – өмір нәрі

Донор қаны – өмір нәрі

Донор сөзі латын тілінен алғанда «сыйлаушы» деген мағынаны білдіреді. Қанға мұқтаж адамға донор болып, қан тапсыру қажетті әрі игі іс. Сондықтан донор болу – әр азаматтың парызы. Рудныйлық полиция қызметкерлерінің пікірі осындай. 12 тамыз күні жергілікті құқық қорғаушылар Қостанайдағы қан орталығының мамандары ұйымдастырған жыл сайынғы «Донор күні» акциясына өз үлестерін қосты.

удныйлық полиция басқармасының капитаны Мария Сұлтанғалиева «Донор күні» акциясының тұрақты қатысушысы. Полиция қызметкерінің қан тобы жиі кездесетіндердің қатарында. Сондықтан адамдардың өмірін құтқаруға үлес қосу міндетім, дейді.
- Мұндай донорлық акциялар барлық адамдарға маңызды деп санаймын. Өйткені қан тапсыру – адамдардың өмірін құтқаруға көмектеседі. Қан тапсырудан қорқудың еш қажеті жоқ. Дәрігерлер барлық процедураны сапалы әрі қауіпсіз орындайды. Ол үшін полиция басқармасының аумағына қан алуға арналған барлық жабдықтары бар арнайы автобус келген, - дейді Полиция басқармасының капитаны.
Облыстық қан орталығының мамандары бүгінгі күні қан тапсырушылар саны азайып, қанның тапшы болып жатқанына алаңдаушылық білдіріп отыр. Сондықтан полиция өкілдерімен бірігіп осындай акцияны ұйымдастыру шешімі қабылданған. Айтып өтейік Рудный қаласындағы қан орталығы үш жыл бұрын жабылған еді. Енді донорларды қабылдау облыстық қан орталығында жүргізілетін болса, қалған елді мекендерге осындай автобустар қатынайды.
- Өткен жылы бұл акцияға полицияның 45 қызметкері қатысты. Биыл одан көбірек болады деген үміттеміз. Себебі қанның барлық топтары қажет. Жергілікті тұрғындарды да донор болуға шақырамын, - дейді облыстық қан орталығының маманы Гүлзира Жанғожина.

Ерғали Убайдуллаев
Суретті түсірген Жарасқан Бекназарұлы