Бірлестік қамқорлығы

Бірлестік қамқорлығы

«Мектепке жол» акциясы аз қамтылған және көп балалы отбасылардың оқушыларына көмек көрсетуге арналған шара. Бұл акцияға қатысамын деушілердің саны жыл санап артып келеді. Биыл бұл шарадан «ССКӨБ» АҚ да қалыс қалмай, өз қызметкерлеріне қамқор болып, балаларды жаңа оқу жылына дайындау үшін қаржылай көмек көрсетуді қолға алды.

Еуразиялық Топтың құрамына кіретін Соколов-Сарыбай тау-кен байыту өндірістік бірлестігі әлеуметтік бағдарланған кәсіпорын болып табылады. Сондықтан мұндай шараларға қатысу кен алыбы үшін дәстүрге айналған. Бірлестіктің әлеуметтік мәселелер жөніндегі басқарма бастығы Александр Макаренконың айтуынша, биылғы «Мектепке жол» акциясы ауқымдылығымен ерекшеленіп отыр. Өткен жылы 2500 оқушы әлеуметтік көмекпен қамтылған болса, биыл қатысушылар саны 4000 мыңға дейін ұлғайған.
- «ССКӨБ» АҚ және кәсіпорын жұмысшылары арасында жасалған ұжымдық келісімшарт бойынша, әлеуметтік көмек көлемі әр балаға 5 АЕК (13890 теңгені) құрап отыр. Бұл жұмысты Кәсіподақ ұйымы жүргізіп, қажетті құжаттарды жинап жатыр. Айтып өтейік әлеуметтік көмек тек қана бірлестікте еңбек ететін, мектепке баратын 3 және одан да көп баласы бар отбасыларға, мүгедек баласын асырап отырған жұмысшыларға тағайындалады.
Әлеуметтік жәрдемақыға бөлініп отырған қаражаттың жалпы көлемі – 58 миллион теңге. 2019 жылы бұл мақсаттарға 32 миллион теңге бөлінген еді. Александр Макаренконың айтуынша биылғы акция 2-3 айға созылып, құжаттарын тапсырып үлгермеген жұмысшыларға осы акциядан құр алақан қалмауға мүмкіндік беріп отыр. Материалдық көмек ата-аналардың құжаттарды тапсыру шамасы бойынша, банк картасына аударылатын болады.
- «Мектепке жол» акциясы бойынша «ССКӨБ» АҚ-нан материалдық көмек алу үшін жоғарыда айтылған топқа жататын жұмысшылар бекітілген ережеге сәйкес құжаттар пакетін ұсыну керек. Бұл құжаттарды жұмыс орындарындағы кәсіподақ ұйымдары қабылдайды.Сол жерден қажетті ақпаратты да алуға болады. Содан кейін жұмысшылардан алынған мәліметтер өңделіп, кәсіпорынның есептік бухгалтериясына жіберіледі. Төлем көп кешіктірілмей картаға аударылады, - дейді «ССКӨБ» АҚ әлеуметтік мәселелер жөніндегі басқарма бастығы.

Ерғали Убайдуллаев
Сурет жеке мұрағаттан алынған