Отбасы – Отан тірегі

Отбасы – Отан тірегі

Отбасы – адамзат баласының дүниеге шыр етіп келгенде, есігін айқара ашып енетін үйі, өсіп ержететін, тәрбие алатын аса қажетті, әрі қасиетті алтын бесігі. Қай заманда, қай елде болмасын отбасының адамзат ұрпағына ықпалы мен әсерін өмірде еш нәрсенің күшімен салыстыруға болмайды.

Елімізде қыркүйек айының екінші жексенбісінде «Отбасы күні» аталып өтіледі. Биыл жетінші жыл қатарынан тойланғалы тұрған бұл күн 13 қыркүйекке тұспа-тұс келіп тұр. 13-қыркүйек күні еліміздің әр аймағында осынау жанұялық құндылықтарды нығайту мақсатындағы мерекеге орай түрлі іс-шаралар мен үгіт-насихаттау жұмыстары жүргізілмек.
Құнды қасиеттер ұмыт қалмауын мақсат еткен мәдениет орталықтары биыл да тұщымды шараларды қолға алды. Рудный қалалық мәдениет және тілдерді дамыту бөлімінде де мерекені атап өтуге байланысты жоспар бекітіліп, бірнеше іс-шаралар ұйымдастырылуда. Елімізде жүріп жатқан пандемияға байланысты барлық іс-шаралар қашықтықтан онлайн форматта жүргізіледі. Рудный қалалық орталықтандырылған кітапхана жүйесінің қызметкерелі бірнеше онлайн іс-шаралар өткізуін жоспарлады. Солардың бірі «Отбасы «біз»ден басталады» атты іс-шара. Танымдық жобаның мақсаты балалардың отбасы жайлы білімдерін кеңейту, отбасылық құндылықтарын дәріптеу, отбасы мүшелерін құрметтеуге тәрбиелеу. Сондай-ақ іс-шара барысында орындалатын лирикалық өлеңдер, сазды әуендер балалардың эстетикалық талғамын қалыптастырады. Осы аптадағы демалыс күндері «Алые паруса» көркемөнерпаздар халықтық шығармашылық үйінің Instagram парақшасында «Бәріміз бақыттымыз» отбасылық альбомын, «Менің отбасым» викторинасын, тағы сол секілді онлайн іс-шараларды тамашалауға болады.
Өткен өмір өрнегі мен тәжірибесіне сүйене отырып, әкенің «батырым», шешенің «құлыным» деген сөзін естіген балада жақсы сезім туатынын ұғасың. Ғ.Мустафинның «Ата-ананың міндеті – тәрбиелеу және жақсылықты үйрету» деген сөзінде көп мағына жатыр. Бала тәрбиесі ол дүниеге келген алғашқы күннен басталады. Өнегелі ұрпақ тәрбиелеу әр ата-ананың арманы және борышы екені даусыз. Әрқашан отбасымыз аман, босағамыз берік болғай!

Жанна ЖАҢБЫРШИНА
Қалалық мәдениет және

тілдерді дамыту бөлімі

басшысының м.а