Психологиялық-педагогикалық түзеу кабинеті ашылды

Психологиялық-педагогикалық түзеу кабинеті ашылды

Қостанай облысында ерекше білім беру қабілеттілігі бар жандармен жұмыс істейтін 22 арнайы ұйым бар: 6 мамандандырылған мектеп, 12 психологиялық-педагогикалық түзеу кабинеті және 4 психологиялық-медициналық-педагогикалық кеңес кабинеті. Жақында олардың қатарын өңірлік білім басқармасының қолдауымен Рудный қаласында ашылған алғашқы психологиялық-педагогикалық кабинеті толықтырды. Бұл игі іске бюджеттен 21 миллион теңге жұмсалған.

Бүгінгі күні Рудный қаласында ерекше білім беру қабілеттілігі бар 2 мыңға жуық бала тіркелген. Ал облыс бойынша олардың саны 10 мыңға жетіп отыр. Облыстық білім басқармасының берген ақпаратына сүйенсек осы балалардың шамамен 70% мамандандырылған білім ордаларындағы, жартылай стационарлар мен арнайы мектепке дейінгі мекемелердегі мамандардың көмегін алып отыр. Осындай мектептерге немесе балабақшаларға бармайтын қалған балалар болса психолог, әлеуметтік педагог, дефектолог және логопед сияқты мамандардың көмегіне облыс орталығына барып жүгінеді екен. Бұл мәселені біршама жеңілдету үшін жуырда психологиялық-педагогикалық кабинеттердің бірі Рудный қаласында ашылып, жыл сайын 150-ге жуық балаға тегін көмек көрсететін болады.
- Психологиялық-педагогикалық кабинет Рудный қаласындағы ерекше білім беру қажеттілігі бар балаларға арналған арнайы мектеп базасында ашылған. Балалар мұнда қол моторикасын жаттықтырумен, емдік дене тәрбиесі залында – тірек-қимыл функциясын дамытумен шұғылданады. Сондай-ақ сөйлеу қабілеті нашар балалармен психолог және логопед мамандары жұмыс істейді. Әзірше бұл кабинетте 5 маман кесте бойынша қабылдау жүргізеді. Олар дене шынықтыру бойынша нұсқаушы, әлеуметтік педагог, дефектолог, логопед және психолог, - дейді Қостанай қаласындағы психологиялық-педагогикалық түзеу кабинетінің Рудный құрылымдық бөлімше басшысы Елена Перцева.
Мамандардың айтуынша қазан айынан бастап бұл кабинетте көру қабілеті бұзылған балалармен тифлопедагог маманы жұмыс істейтін болады. Бірақ бұл жұмыста көмегін тигізетін сурдоаудармашыны әзірге табу мүмкін болмай отыр, сол себептен кабинет қызметкерлерінің бірін осы мамандыққа қосымша оқыту қарастырылуда.
Облыс орталығындағы осындай кабинеттердің бірінде меңгеруші болып жұмыс істейтін Жанна Атыгаеваның айтуынша, психологиялық-педагогикалық кабинетке келер алдында, әрбір баланың қабілеттілігі тексеріліп, қандай маманның көмегі қажет екендігі анықталады. Осыдан кейін әрбір бала үшін жаттығу, дамыту бағдарламасы әзірленіп, сабақтар кезең-кезеңімен өткізіледі. Оқытудың бір кезеңі 3 айды құрайды. Егер бала бірінші кезеңнен даму динамикасын көрсететін болса, әрі қарай келесі кезекте тұрған балалар қабылданады.
Айтып өтейік осындай игі істі жалғастыру мақсатында биылғы жылдың қараша айында ерекше білім беру қажеттіліктері бар балалар үшін Рудный қаласында инклюзивті білім беретін кабинетті ашу жоспарланған. Бұл кабинет Тұңғыш Президентіміздің «Қамқорлық» қорынан бөлінген қаржы есебінен 17-ші орта мектепте ашылмақ.

Ерғали Убайдуллаев
Суретті түсірген автор