Ұрлық түбі – қорлық!

Рудный қаласының екі тұрғыны өзгенің мүлкін ұрлағаны үшін ұсталды. Бұл туралы қалалық полиция басқармасының баспасөз қызметі өз Instagramm парақшасында жариялады. Белгілі болғандай, 1999 жылы туған Рудный қаласының жұмыссыз тұрғыны «Вояж» шағын маркетінде ұрлық жасаған. 

 Ұрланған заттардың тізімінде екі бөтелке шарап, бір қорап кәмпит және хош иісті шам болған. Бұл тізімге қарасаңыз бірінші келетін ой 21 жастағы нәзік жанды ару романтикалық кешке дайындалған ба дерсіз. Дегенмен қандай мақсатта ұрлық жасаса да қала тұрғынының жолы болмады. Ұрлықшы жасырынуға тырысқан, дегенмен көп ұзамай нақты айғақтардың көмегімен тәртіп сақшылары оны қолға алды. Ұрланған заттардың жалпы құны 8645 теңгені құрайды.
Осыдан біраз уақыт бұрын, 1972 жылы туған Рудный қаласының тағы бір жұмыссыз тұрғыны ұрлық жасап, қолға түскен болатын. 48 жастағы әйелдің айласы мен қысымы басымырақ болғаны жазаны да ауырлатуы мүмкін. Өзінің танысының үйінде қонақта болып, құны 40 000 теңгелік ұялы телефонын, екі сим картасын, 230 000 теңге ақшасы бар банктік картасын ұрлап кеткен. Сенімге кіріп, сан соқтырған бұл күдіктіні де тәртіп сақшылары көп ұзамай қолға түсірген.
«Ер бұзылса отбасы бұзылады, ал, әйел бұзылса ұлт бұзылады» деп қазақ бекер айтпаған. Ұрлыққа қолы барып, алаяқтық жасағандардың әйел азамат екені көңілді қынжылтады. Жоғарыда келтірілген екі деректер бойынша Қазақстан Республикасының Қылмыстық Кодексінің 188 бабы, 1-бөлігі бойынша қылмыстық іс те қозғалды. Алаяқтар жауапкершіліктен құтылмасы анық.

Жарасқан БЕКНАЗАРҰЛЫ
Сурет интернеттен алынған