Жаңа жабдық – өнімді жұмыс

Техника дамыған заманда қала құрушы кәсіпорын өркениеттен қалыс қалған емес. Бүгінгі техникалар, жабдықтар мен қондырғылар – талапқа сай, өндіріс қарқынын өндіріп отыр. Солардың бірі ССКӨБ-тің жылжымалы құрамды жөндеу цехына жаңадан алып келінген темір кескіш жабдығы. Темір табақшаларды тіліп тастайтын бұл құрылғы цехтың жұмысын екі есеге жеңілдеткен. 

 Отыз жылдай осы міндетті атқарып келген ескі темір кескіш енді жаңасына ауыстырылды. Ескісінің өзі қалыңдығы 25 миллиметрге дейінгі темір табақтарын еш қиындықсыз турап келген. Жылдар өте бұл құрылғының мүмкіндіктері талапқа сай келмей, қауіпсіздікті және өнімділікті арттыру мақсатында жаңасына ауыстыру шешімі қабылданған.
– Құрылғы өткен жылдың соңында инвестициялық бағдарлама негізінде сатып алынған. Оны орнату, монтаждау жұмыстары жүргізілді және сәтті іске қостық. Қазір бұл құрылғы тоқтаусыз жұмыс істеп тұр. Қалыңдығы 6 мллиметрден 36 миллиметрге дейінгі темір табақшаларды кесуге қауқарлы, – дейді «ССКӨБ» АҚ ЖҚЖЦ дайындама жасау бөлімшесінің бастығы Алексей Стрельников.
Бұл цехта тарту агрегаттары, қозғалтқышты думпкарлардың шанағы және вагондар жөнделеді. Заманауи құрылғы сол жөндеуге керекті темір табақшаларды кеседі. Жаңа құрылғы қауіпсіз жұмыс істеуге мүмкіндік беріп отыр. Лазерлі сызғыш нақты кесуге кепілдік береді. Нәтижеде цехтағы өндіріс қарқыны сезіліктей артты дейді мамандар.

Жарасқан НҰРЫБАЕВ
Суретті түсірген Қуаныш ЕСҚАБЫЛ