Салық төлеушілердің назарына!

Рудный қалалық мемлекеттік кірістер басқармасының мамандары көлік, жер және мүлік салығы бойынша берешегі бар азаматтарды жылдың аяғына дейін жарияланып отырған салық амнистиясына қатысуға шақырып отыр. Енді ағымдағы жылдың 31 желтоқсанына дейін салықтар бойынша негізгі қарыз сомасын төлесеңіз, қарыз үстіне қосылған өсімпұл толық шегерілетін болады. Бұл жеңілдік биылғы жылдың 1-ші қаңтарына дейін қалыптасқан жеке тұлғалардың барлық салық берешегіне қатысты қолданылады.

 Жергілікті мемлекеттік кірістер басқармасы мамандарының берген ақпаратына сүйенсек, бүгінгі күні қаламыз бойынша шамамен 21 мың азаматтың салық берешегі бар. Салықтар бойынша қарыздардың жалпы сомасы 86 миллион теңгеден асып отыр. Берешектің басым бөлігі көлік салығы бойынша қалыптасқан және қаламыздың 3 мыңға жуық азаматы бюджетке 78 миллион теңгедей қарыз екен. Ал жер және мүлік салығы бойынша 18 мың азамат бюджетке 8 миллион теңге берешек. Салық қызметкерлерінің айтуынша тұрғындардың салық төлеуден жалтаруы, бюджеттің азаюына, салдарынан тиісті әлеуметтік бағдарламалардың жүзеге асырылмауына әкеп соқтырады.
– Борышкерден салық берешегін өндіріп алу үшін барлық заңды шараларды қолданатын боламыз. Дәлірек айтсақ, қарызы бар азаматқа ескерту хаты жіберіліп, 30 күннен кейін салық бұйрығы шығарылады. Бұдан кейін бұл құжат сот орындаушыларына жіберіледі. Сот орындаушы борышкердің мүлкіне, көлігіне және банктегі шоттарына шектеу қоюы мүмкін. Егер салықты уақтылы төлемесеңіз, бұл мүлкіңіз сатылып, түскен қаражат қарызды жабуға бағытталады. Бұдан бөлек салық төлеуден жалтарып жүрген азамат әкімшілік жауапкершілікке тартырылп, берешегі 20 АЕК-тен (55560 теңгеден) асатын болса шетелге шығуына тыйым салынады, – дейді мемлекеттік кірістер басқармасының бөлім маманы Уәлихан Үкенов.
Салық басқармасының мамандары ұсынылып отырған жеңілдікті пайдалану үшін негізгі қарыз сомасын төлесеңіз жеткілікті деп отыр. Бұдан кейін негізгі қарызға қосылған өсімпұл автоматты түрде шегеріледі екен. Уәлихан Үкеновтың сөзінше мұндай жеңілдік 2020 жылдың 31 желтоқсанына дейін күшінде болмақ. Барлық туындаған сұрақтар бойынша тұрғындар Парковая көшесі 14 мекенжайы бойынша орналасқан Мемлекеттік кірістер басқармасына келіп немесе 4-33-73 (қосымша 136,134) телефоны бойынша жүгіне алады.
Салық басқармасының мамандары қазіргі шектеу жағдайларында салық берешегін «е-Salyq mobile» қосымшасы және екінші деңгейлі банктердің ұялы қосымшалары арқылы төлеуге болатынын айтты. Сонымен қатар азаматтың салық берешегінің бар-жоғын Мемлекеттік кірістер комитетінің ресми сайтынан да тексеруге болады.

Ерғали Убайдуллаев
Суретті түсірген автор