Мерзімді жөндеу

Қашар кен өндіру кешеніндегі алып самосвалдарды кезекті техникалық тексерістен өткізу үшін небәрі 6 сағат жұмсалады екен. Бұл жұмыстар кешенде орнатылған үрленбелі бокста жүргізіліп, көп тонналық автосамосвалдарды қамтиды. Мұндағы мамандардың күшімен сапалы орындалған жұмыстар техниканың 10 жыл бойы тоқтаусыз жұмыс істеуіне мүмкіндік беріп отыр. 

 «Хитачи» маркалы 180 тонналық автосамосвалдар 250, 500, 1000 және бұдан да көп мотосағат бойы үздіксіз қызмет еткеннен кейін кезекті техникалық тексеріске жіберіледі. Жөндеу ұзақтығы техниканың жұмыс істеу уақытына қарай әртүрлі. Мысалы 250 мотосағат жұмыс істеген автосамосвалды тексеріп, майы мен сүзгілерін ауыстыру үшін мамандар небәрі 6 сағат жұмсайды екен. Бұдан кейін алып машина күнделікті қызметіне қайта оралады.
- Мұндай жұмыстар біздегі техникалық тексеру жоспарына сәйкес жүргізіледі. Тексерістердің кезеңділігі әртүрлі. Егер қосымша ақаулары анықталмайтын болса, 250 сағат үздіксіз жұмыс істеген самосвалға 6 сағат жұмсаймыз. Жұмыс көлемі де аз болғандықтан 2 маманымызды жұмылдырамыз. Үрленбелі бокста барлық қажетті құралдарымыз, диагностикалық жабдықтарымыз бар. Солардың көмегімен техниканың қазіргі жағдайын толық біліп, ақауларын да анықтау оңай. Алып самосвалдардан бөлек үрленбелі бокста эксковаторлардың да бірнеше түрлері мерзімді тексерістен өтеді. Сондықтан бұл жер ешқашан бос тұрмайды, - дейді «Eurasian Machinery» компаниясының Қашар жобасы бойынша супервайзері Ғани Бабахов.
180 тонналық Хитачи маркалы автосамосвалдардың басым бөлігі бірлестіктің Қашар алаңына 2016 жылы келіп түскен. Кешендегі мұндай алып техниканың жалпы саны 21 бірлікті құрайды. 180 тонналықтармен бірге үрленбелі бокста мамандар 90 тонналық кіші самосвалдарға да қызмет көрсетіп, кеніштегі тоқтаусыз жұмысқа өз үлестерін қосып отыр.

Ерғали Убайдуллаев
Суретті түсірген автор